باسمه تعالیٰ،
اسمِ اعظم کے بارے میں متعدد اقوال اور آراء پائی جاتی ہیں۔
📖 بصائر الدرجات میں حضرت صادق علیہ السلام سے روایت ہے کہ: "خداوند نے اسمِ اعظم کو ۷۳ حرف پر مشتمل قرار دیا، اور آدم کو ۲۵ حرف، نوح کو ۱۵ حروف، ابراہیم کو آٹھ حرف، موسیٰ کو چار حرف اور عیسیٰ کو دو حرف عطا فرمائے۔ پس عیسیٰ اُن دو حروف کے ذریعے مُردوں کو زندہ کرتے تھے اور (پیدائشی) اندھے پن اور کوڑھ کو شفا دیتے تھے، اور محمد صلی اللہ علیہ و آلہٖ و سلم کو ۷۲ حرف عطا کیے اور ایک حرف کو اپنے لیے برگزیدہ (مخصوص) رکھا۔"
📖 «شرح صحیفہ» میں پچاسویں دعا کی شرح میں ابی جعفر صفّار سے، اور بصائر الدرجات میں متصل سند کے ساتھ حضرت امام محمد باقر علیہ السلام سے اُنہی کی روایت نقل کی گئی ہے، جو اس مضمون کے قریب ہے:
"خدا کا اسمِ اعظم ۷۳ حرف پر مشتمل ہے، اور «آصف» کے پاس اس میں سے ایک حرف تھا جس کے ذریعے اُس نے «بلقیس» کا تخت اُس رفتار کے ساتھ، جو قرآن مجید میں مذکور ہے، «حضرت سلیمان» کے پاس حاضر کر دیا اور اُسے اُس کی اپنی جگہ پر واپس بھی پہنچا دیا، اور ہمارے (یعنی ہم اہلِ بیت کے) پاس اس کے ۷۲ حرف ہیں اور ایک حرف کو خدا نے اپنے لیے مخصوص (اور برگزیدہ) رکھا؛ اور کوئی طاقت اور کوئی قوت نہیں مگر اللہ بزرگ و برتر (علی العظیم) کی طرف سے ہے۔"
اور اس حدیث کی ایک شرح ہے جو بعض کتب، جیسے «شرح صحیفہ» اور نیز «شرح اسماء الحسنٰی» ہمدانی میں مذکور ہے۔
📖 حضرت امام رضا علیہ السلام سے روایت ہے کہ: "بسم اللہ الرحمن الرحیم خدا کے اسمِ اعظم سے آنکھ کی سیاہی کے سفیدی سے (بھی) زیادہ قریب (نزدیک) ہے۔
(عیاشی، تفسیر، ج۱، ص۲۱؛ حویزی، تفسیر نور الثقلین، ج1، ص۸)
📖 مجمع البیان (تفسیر سوره حشر) میں حضرت رسول اعظم صلی اللہ علیہ و آلہٖ و سلم سے روایت ہے کہ: "اسمِ اعظم سورہ حشر کی آخری چھ آیات میں ہے۔"
📖 «الکلم الطیب» میں اسمِ اعظم کے لیے کچھ نشانیاں بیان فرمائی ہیں اور فرماتے ہیں کہ اسمِ اعظم قرآن کی پانچ سورتوں (بقره، آلِ عمران، نساء، طٰہٰ اور تغابن) کی پانچ آیات میں ہے۔
(طیب، الکلم الطیب، ص59)
📖 بعض دوسروں نے کہا ہے کہ «الحی القیوم» اسماءِ حسنىٰ میں اعظم ہے۔
📖 مصباح کفعمی میں ہے: دعائے «جوشن کبیر»، «مشلول» اور «مجیر» اُن دعاؤں میں سے ہیں جن میں اسمِ اعظم کے موجود ہونے کی روایت ہوئی ہے۔
(کفعمی، المصباح، ص۳۱۲)
📖 بعض دوسری روایات میں حضرت امام رضا علیہ السلام سے روایت ہے کہ: "العلی العظیم" ہی اسمِ اعظم ہے، کیونکہ اللہ تعالیٰ ہر چیز سے بلند تر اور ہر چیز سے عظیم تر ہے۔
(مجلسی، بحار الانوار، ج4، ص175)
📖 شیخ صدوق نے «ثواب الاعمال» میں حضرت صادق علیہ السلام سے روایت نقل کی ہے کہ: "خدا کا اسمِ اعظم سورہ «فاتحۃ الکتاب» میں بکھری ہوئی صورت میں موجود ہے؛ یعنی اس کے حروف، سب کے سب اسی سورہ میں ہیں۔"
(صدوق، ثواب الاعمال، ص104)
لیکن اسمِ اعظم کو پہچاننے کے طریقے کے بارے میں اس موضوع پر مشہور و نامور شیخ، نابغۂ روزگار «شیخ بہاء الدین محمد عاملی» سے منسوب اشعار ہیں۔ یہ مضمون «کلیات شیخ»، «بیان الآیات فی علم الزبر و البینات» اور «روائح النسمات» میں شرح و توضیح کے ساتھ مذکور ہے۔
1️⃣ علماء کے نزدیک، اس راہ میں صرف قوت و قدرت حاصل کرنے اور اسمِ اعظم کے آثار سے دنیوی مقاصد کے لیے فائدہ اٹھانے اور اس کے ذریعے عجائبات (کرامات یا خارق عادات) ظاہر کرنے کی غرض سے داخل ہونا، خود انسان اور خدا کے درمیان حجاب بن جاتا ہے اور باطن کی کدورت (گندگی اور تاریکی) کا سبب بنتا ہے اور اخلاص اور قلب کی صفائی کے منافی ہے۔
اس وادی میں قدم رکھنا سبب بنتا ہے کہ انسان اپنی عمر حروف، حساب، اوقاف و حرکات اور اس قسم کے مطالب میں ضائع کر دے اور علمی و عملی کمالِ قوت سے جو عبادت، اطاعت، تفکر، مطالعہ، آیاتِ آفاقیہ (کائناتی نشانیاں) و انفسیہ (نفسی نشانیاں) میں غور و فکر، اور قرآن مجید کے معانی اور اہلِ بیت علیہم السلام کی احادیث پر نظر کرنے سے حاصل ہوتی ہے محروم رہ جائے؛ اور اسی مرحلے پر رک جائے اور عمر بھر وقت صرف کرنے کے بعد یہ محسوس کرے کہ اس نے غلطی کی ہے اور فرصتیں کھو دی ہیں۔
ہاں، اگر اس اسم کا علم اس حد اور مقدار تک (جو انبیاء اور ائمہ علیہم السلام کے علاوہ دوسروں کے لیے ممکن ہے) کسی کو حاصل ہو جائے، تو یہ تعبّد (بندگی اور اطاعت شعار) اور شرعی احکام کی پابندی، واجبات اور مستحبات کی انجام دہی، محرمات اور مکروہات سے اجتناب، اخلاقِ حمیدہ (اچھے اخلاق) کو اپنانا اور صفاتِ ذمیمہ (بری صفات) سے بچنا، اور ذکرِ الٰہی کی پابندی کے ذریعے حاصل ہوتا ہے؛ بشرطیکہ ان فرائض کی ادائیگی کا مقصد اللہ کے حکم کی اطاعت و پیروی، اس کی بارگاہ میں تقرب، نفس کی تکمیل، اخلاق کی اصلاح اور (روحانی) حجابات کا اٹھ جانا ہو۔
اس صورت میں خود اسمِ اعظم کو بشکلِ خاص جاننا ضروری نہیں ہے؛ اور اگر اللہ کی راہ میں چلنے والا سالک، انہی اسماء میں جو روایات میں اسمِ اعظم کے طور پر متعارف کرائے گئے ہیں غور و فکر کرے اور ان کے معانی تک جہاں تک ممکن ہو، معرفت حاصل کرے اور انہیں اپنی زبان کا وِرد بنالے، تو یقیناً اس راہ سے جو فوائد اور برکتیں اسے حاصل ہوں گی، وہ غیر معمولی ہوں گی۔
اسم اعظم کے سلسلہ میں مختلف روایات سے یہ نتیجہ نکلتا ہے کہ جو شخص بھی اسم اعظم سے باخبر ہو جائے تو نہ صرف یہ کہ اس کی دعا قبول ہو جاتی ہے بلکہ وہ شخص اس اسم اعظم کے ذریعہ اس دنیا کی بہت سی چیزوں میں تصرف کرسکتا ہے اور بہت سے عجیب و غریب کام انجام دے سکتا ہے۔
خدا کے ناموں میں سے کونسا نام اسم اعظم ہے؟ اس سلسلہ میں علمائے اسلام نے بہت زیادہ بحث و گفتگو کی ہے، اور اس موضوع پر اکثر بحثیں ہوا کرتی ہیں کہ خدا کے ناموں میں اس اسم کو تلاش کریں جو عجیب و غریب خاصیت رکھتا ہو۔
لیکن ہمارے نظریہ کے مطابق جس چیز پر زیادہ توجہ ہونا چاہئے وہ یہ ہے کہ خدا کے اسماء اور صفات کا پتہ لگائیں ان کے مفہوم کو اپنے اندر پیدا کریں اور روحانی تکامل و پیشرفت حاصل کریں جن کے ذریعہ ہماری ذات پر اثر ہوسکے۔
دوسرے الفاظ میں اہم مسئلہ یہ ہے کہ ہم اپنے اندر ان صفات کو پیدا کریں اور اپنے کردار کو ان صفات سے مزین کریں، ورنہ گناہوں میں آلودہ شخص اور ایک ذلیل انسان کیا اسم اعظم کا علم حاصل کرنے سے مستجاب الدعوة ہوسکتا ہے؟
اگر ہم سنتے ہیں کہ ”بلعم“ نامی شخص اسم اعظم کا علم رکھتا تھا لیکن بعد میں اس سے ہاتھ دھو بیٹھا تو اس کا مطلب یہ ہے کہ اس نے ایمان و عمل صالح اور تقویٰ و پرہیزگاری کے ذریعہ اس روحانی درجہ کو حاصل کرلیا تھا لہٰذا اس کی دعا قبول ہو جاتی تھی، لیکن اپنی خطاؤں کے ذریعہ (کیونکہ انسان خطا و غلطی سے پاک نہیں ہے) اور اپنے زمانہ کے فرعونی اور طاغوتی طاقتوں اور اپنی ہوا وہوس کی بنا پر اس روحانی طاقت کو بالکل کھو دیا ، اور اس مرتبہ سے گر گیا، اسم اعظم کے بھول جانے سے یہی معنی مراد ہوسکتے ہیں۔
اور اسی طرح اگر ہم کتابوں میں پڑھتے ہیں کہ انبیاء اور ائمہ علیہم السلام اسم اعظم سے آگاہ تھے تو اس کا مطلب یہ ہے کہ ان کے وجود میں خدا کے اسم اعظم کی حقیقت جلوہ گر ہوتی تھی، اور اسی وجہ سے خداوند عالم نے ان کو اس عظیم مرتبہ پر فائز کیا تھا۔
2️⃣ اور یہ کہ وہ اسمِ اعظم جو حدیث میں ۷۳ حرف پر مشتمل بتایا گیا ہے، اور جس میں سے حضرت عیسیٰ علیہ السلام کو دو حرف دیے گئے تھے، اسی حدیث کے مطابق اس اسم کے تمام حروف کی معرفت کسی کو بھی حاصل نہیں ہو سکتی؛ کیونکہ اس کا ایک حرف اللہ نے اپنے لیے مخصوص رکھا ہے، اور پیغمبر اکرم صلی اللہ علیہ و آلہٖ و سلم اور ائمہ علیہم السلام کو اس میں سے ۷۲ حرف عطا کیے گئے ہیں، اور آدم کو پچیس حرف، نوح کو پندرہ حرف، ابراہیم کو آٹھ حرف اور موسیٰ کو چار حرف عطا کیے گئے ہیں۔
مگر یہ کہ کوئی کہے کہ ایک حرف کے بقدر جو «آصف» کو عطا ہوا تھا ممکن ہے بہترین افراد جیسے: سلمان، ابوذر، میثم تمّار اور رشید ہجری کو بھی عطا کیا گیا ہو۔ اللہ ہی اپنے فضل اور عنایت کے مقام و محل کو بہتر جانتا ہے۔
نکتہ جو یہاں بیان کرنا ضروری ہے وہ یہ ہے کہ: یہ معلوم نہیں کہ یہ تمام حروف ایک ہی اثر اور خاصیت رکھتے ہیں؛ بلکہ ممکن ہے کہ وہ مختلف ہوں، اور ہر ایک کا علم الگ الگ آثار رکھتا ہو، اور بہت ممکن ہے کہ عیسیٰ (علیہ السلام) کے دو حرف نوح (علیہ السلام) کے پندرہ حروف سے زیادہ عظیم ہوں۔ نیز ممکن ہے کہ وہ ایک حرف جو کسی کو عطا نہیں کیا گیا، ان تمام حروف سے بھی اعظم اور اکبر ہو، جسے مخلوقات میں سے کسی کی بھی لیاقت اور ظرفیت نہ ہو کہ وہ اسے حاصل کر سکے۔
3️⃣ بعض علما اور اربابِ نظر اس رائے پر ہیں کہ یہ ۷۳ حرف، حروفِ ہجائی (تہجی کے حروف) نہیں ہیں؛ بلکہ وہ حقائق (حقیقتیں) ہیں جن کا ادراک اور فہم اہم آثار رکھتا ہے، اور وہ کہتے ہیں کہ اس بات کی دلیل کہ اسمِ اعظم ان ۷۳ حروف کا لفظی مرکب نہیں، یہ ہے کہ یہ تمام حروف کسی کو عطا نہیں کیے گئے، اور جن کو عطا کیے گئے، انہیں ایک حرف سے لے کر ۷۲ حرف تک دیے گئے ہیں۔
پس اگر ان حروف کا لفظی مرکب مراد ہو جب کہ اس کا ایک حرف معلوم نہ ہو تو اس کا مفہوم قابلِ فہم نہیں ہوگا؛ مگر یہ کہ کوئی یہ کہے کہ ان حروف کی شرافت اور اہمیت اسی وجہ سے ہے کہ اسمِ اعظم انہی سے مرکب ہے، اور صورتِ حال یہ ہے کہ جب کوئی شخص ان میں سے ہر حرف کو بالخصوص پہچان لے، تو اس کے اثرات مرتب ہوتے ہیں۔
ایک دوسرا پہلو یہ ہے کہ اگر ان حروف سے حروفِ ہجائیہ مراد ہوں، تو وہ اٹھائیس حروف سے تجاوز نہیں کرتے؛ حالانکہ روایت میں ۷۳ حروف متعین کیے گئے ہیں، اور یہ کہنا کہ یہ ۷۳ حروف بعض حروف کی تکرار سے حاصل ہوئے ہیں، بھی بعید ہے۔
ایک اور پہلو یہ ہے کہ: «آصف» کے بارے میں جو ان روایات کے مطابق اسمِ اعظم کا ایک حرف جانتا تھا قرآن میں آیا ہے:
قَالَ الَّذِی عِنْدَهُ عِلْمٌ مِنَ الْکِتَابِ
(نمل، 40)
اور یہ احتمال کہ کتاب سے مراد اسمِ اعظم جو حروفِ ہجائیہ سے مرکب ہو، اور جو علم آصف کو حاصل تھا وہ اس اسم کا ایک ہجائی حرف ہو، بعید ہے۔
پس ممکن ہے ان روایات میں «اسمِ اعظم» سے مراد مجموعی طور پر عالمِ کائنات اور ماسویٰ اللہ ہو؛ اور علم سے مراد وہ علومِ کونیہ، کائنات شناسی، اور مخلوقات کے باہمی رشتوں، سیاروں، کرّوں اور منظوموں کی وسعت و وزن، تمام موجوداتِ عالمِ خلقت کے خواص، اور ان کے ظاہر و باطن، روح و جسم، زمین و آسمان، فرشتے اور وہ مخلوقات جو دریافت ہو چکی ہیں اور جو ابھی دریافت نہیں ہوئیں، ان سب کی آگاہی ہو۔
ہر شخص جس قدر اس متقن (مضبوط اور محکم) نظام میں الٰہی تقدیرات سے آگاہ ہو جاتا ہے، وہ ایسے کام کرسکتا ہے جنہیں انجام دینے سے جہلاء (جاہل لوگ) عاجز ہیں، اور چونکہ «آصف» کو اس عالمِ کون کے باہمی رشتوں اور مادی اور ماورائے مادی علوم کے ۷۳ حصوں میں سے ایک حصے (ایک جزو) کا علم تھا، اس لیے وہ اُس رفتار سے بلقیس کا تخت حاضر کر سکا۔
اس کا مطلب کہ انبیاء اور ائمہ (علیہم السلام) میں سے ہر ایک کو ان حروف میں سے ایک خاص تعداد حاصل تھی، دراصل اُن کے علوم کی وسعت اور تنگی یعنی اُن کی کائنات شناسی (عالم بینی) کو اس کے مکمل مفہوم میں بیان کرنا ہے۔
اس کی دلیل یہ آیت ہے:
قُلْ کَفَى بِاللَّهِ شَهِیدًا بَیْنِی وَبَیْنَکُمْ وَمَنْ عِنْدَهُ عِلْمُ الْکِتَابِ
(رعد، 43)
کہ بعض تفاسیر کے مطابق «مَنْ عِنْدَهُ عِلْمُ الْکِتَابِ» سے مراد امیرالمؤمنین علیہ السلام ہیں کہ اگر «آصف» کو کتاب کا ایک علم (ایک جزوی علم) اور اس کا ایک حصہ حاصل تھا، تو حضرت امیر علیہ السلام کے پاس تمام علمِ کتاب موجود تھا؛ پس یہ عجیب نہیں اگر آپ (علیہ السلام) فرماتے تھے:
سَلُونِی قَبْلَ أَنْ تَفْقِدُونِی فَلَأَنَا بِطُرُقِ السَّمَاءِ أَعْلَمُ مِنِّی بِطُرُقِ الْأَرْضِ
(نهج البلاغة، خطبه 189)
یہ نکتہ بھی پوشیدہ نہ رہے کہ بعض روایات میں ایک مخصوص اسم جیسے «الحی القیّوم» اور بعض دوسری روایات میں کوئی اور اسم جیسے «العلی العظیم» کو اسمِ اعظم کہا گیا ہے، ان میں کوئی تضاد نہیں؛ کیونکہ ممکن ہے ان اطلاقات میں اسمِ اعظم سے مراد وہ اسماء ہوں جو یا تو دوسرے اسماء کو زیادہ صراحت کے ساتھ شامل کرتے ہوں اور اسماء کے ایک مجموعہ سے افضل (فوق) ہوں، یا ان کی دلالت زیادہ صریح یا زیادہ سچی ہو؛ اور اسی قسم کی ملحوظات (اعتبارات) کی بنا پر انہیں اسمِ اعظم کہا جاتا ہے۔
دوسرے الفاظ میں اسماء اللہ الحسنیٰ، اس لحاظ سے کہ وہ ذات اور صفاتِ باری تعالیٰ پر دلالت کرتے ہیں، اور ممکنہ موجودات کے اسماء کے مقابلے میں اسمِ اعظم، اجل اور اکبر ہیں، انہیں میں بھی آپس میں دلالت کی وسعت اور عمومیت کے اعتبار سے بعض بعض سے اعظم ہیں اور بعض ایسے اسم کے تحت آتے ہیں جو ان سے مافوق (بالاتر) ہے، یہاں تک کہ وہ اسمِ اللہِ اعظم پہنچ جائے جس کے تحت تمام اسماء ہوں۔ پس ایسے اعتبارات کی بنا پر ممکن ہے کہ متعدد اسماء کو اسمِ اعظم کہا جائے۔
اسی طرح ممکن ہے کہ ان اسماء کے معانی کی اسمِ اعظم سے قربت، یا ان کے لفظ کے کچھ حروفِ اسمِ اعظم سے مشتمل ہونے کی بنا پر، حقیقتاً یا مجازاً ان پر بھی «اسمِ اعظم» کا اطلاق کیا جائے۔"
اور جیسا کہ کہا گیا، ان اطلاقات کے فوائد میں سے ایک یہ بھی ہے کہ بندگان ان اسماء کے حفظ، اور ذکر و ان کے معانی و تفسیر کی طرف توجہ اور پابندی کا زیادہ اہتمام کریں؛ اور نیز اسمِ اعظم کو باقی اسماء میں سے پہچاننے کے ذریعے، باقی اسماء کی برکات اور معرفت سے محروم نہ رہ جائیں۔
اگر اسمِ اعظم صرف آوازوں (اصوات) اور حروف سے عبارت ہو، تو وہ اپنی ذات سے موثر (تاثیر پیدا کرنے والا) نہیں ہے؛ بلکہ موثر اور فاعل وہ ذاتِ بے زوال ہے جس کا یہ نام ہے، جو اس نام کے ساتھ دعا کرنے پر دعا کو مستجاب کر دیتی ہے۔
جو کچھ کہا گیا اس سے یہ واضح ہو گیا کہ یہ بحث ہر لحاظ سے بہت دقیق علمی بحثوں میں سے ہے اور اسے ختم کرنا انتہائی دشوار کام ہے؛ کیونکہ اس کے بارے میں جتنا بھی لکھا جائے اس کا دائرہ وسیع تر ہوتا جاتا ہے اور عوام کے افہام (فہم) کے افق سے دور تر ہوتا جاتا ہے؛ گویا اس کی تلاش اور تحقیق اس کی پیچیدگی اور گہرائی میں مزید اضافہ کر دیتی ہے۔ اور کوئی طاقت اور کوئی قوت نہیں مگر اللہ برتر و عظیم کی طرف سے۔
بزرگ محققین کے لیے بھی اس موضوع کی حقیقت کا علم جیسا کہ اس کا اصل حق ہے حاصل نہیں ہوا، اور ہماری علمی و عملی استعداد اس سے ناقص تر ہے کہ اس موضوع کو پوری طرح اور اطمینان بخش انداز میں ختم کر سکیں۔
گزر گئی ہے عمر ہوئیں مجلسیں تمام
ہم رہ گئے ہیں حیران تیری پہلی ہی صفت پر
علامہ سید شہروز زیدی